Skuadrat mysafire kanë mbizotëruar në katër ndeshjet e javës së 24-të në Vala Superligë që u zhvilluan sot.

Skuadra kampione në fuqi, Feronikeli ka shënuar fitore me rezultat bindës si mysafire në duel me Ferizajn, me shifrat 4:0. Golat për Feronikelin i shënuan Labinot Osmani (66’, 90’+), Mentor Zhdrella (73’) dhe Blerand Kurtishaj (89’). Fitore me rezultat ka shënuar edhe Prishtina në Gjilan, duke e mposhtur Dritën, me rezultat 3:1.

Shënues i trefishtë për Prishtinën ishte Basid Khalid, që e dërgoi topin në rrjetë në minutat 51’, 55’ dhe 86’, derisa golin e vetëm për Dritën e realizoi Alban Shillova (88’).

Me të njëjtin rezultat 1:3 fitoi edhe Llapi në Mitrovicë në përballje me Trepçën, me golat e shënuar nga Krasniqi, Shaqiri dhe Daku, derisa golin e vetëm për mitrovicasit e realizoi Zabërgja.

Ndërkohë, fitoren me rezultatin më bindës e realizoi Besa, e cila e mposhti Hajvalinë në Kizhnicë, me rezultat 6:1.

Tre gola i shënoi Qemajl Elshani (36’, 85’, 89’), kurse me dy gola kontribuoi Xhevdet Shabani (28’, 41’) dhe me një gol Leart Emini (44’), derisa golin e nderit për Hajvalinë e shënoi Vilson Morina (46’)./Arbresh.info